ഭൗമശാസ്ത്രപഠനകേന്ദ്രം.

ഭൗമശാസ്ത്രപഠനകേന്ദ്രം.  

നിറയുന്നൂ പാരിലെങ്ങും ഭൌമ ശാസ്ത്രപഠനത്തിൻ 

നിറകുടമായ് വിലസും *സെസ്സിൻ* കീർത്തികൾ !

നിരന്തര ഗവേഷണ,നിരീക്ഷണം ചെയ്തിവിടെ 

നിരവധി ശാസ്ത്രസത്യം വെളിവാക്കുന്നു.

അനന്തവുമജ്ഞാതവുമവർണ്ണനീയവുമല്ലോ,

അഖിലാണ്ഡമണ്ഡലത്തിൻ പ്രതിഭാസങ്ങൾ. 

അവയുടെ രഹസ്യത്തിൻ പൊരുളറിഞ്ഞീടുവാൻ 

അനുസ്യൂതം ഞങ്ങളോത്തു ശ്രമിച്ചീടുന്നു.

സാഗരവുമംബരവുമിടയ്ക്കാർദ്രമായ കരയുമായ്  

ജീവന്നാധാരമാം ഗ്രഹമൊന്നീ ഭൂമിതാനല്ലോ? 

ഭൂമിയെ സുസ്ഥിരമായ് നിലനിർത്തീടുവാനീ- 

ഭൂവാസികൾ നമ്മൾ ഏറെ കടമയുള്ളോർ. 

"പ്രദൂഷിതമാക്കീടാതെ ഭൂമിയെ സംരക്ഷിക്കൂ" 

പ്രണവമന്ത്രമിതു നിത്യം ചൊല്ലീടുക നാം.

പ്രകൃതിയെ മറന്നുള്ള ജീവിതശൈലിയായാൽ 

പ്രകൃതി ക്ഷോഭങ്ങളാൽ നാം ശിക്ഷിതരാകാം. 

പ്രളയത്തിൻ കെടുതികൾ,വരൾച്ചതൻവറുതികൾ,

പ്രകമ്പനം സൃഷ്ടിക്കുന്ന വൻഭൂകമ്പങ്ങളും 

മരണത്തിൻ കാഹളമായ് ചുഴലിക്കാറ്റടിച്ചീടാം  

മാരകമാം രോഗമെങ്ങും താണ്ഡവമാടാം .

അഗ്നിജ്ജ്വാലവമിക്കുന്ന,പർവതങ്ങളൊരുക്കീടും

അഗ്നികുണ്ഡമതിൽ നമ്മൾ ഹോമിക്കപ്പെടാം.

അലയടിച്ചാർത്തുവരും "സുനാമി"ത്തിരകളോ ,

കലിതുള്ളും കടലാക്കാം തീരഭൂമിയെ.

മിന്നലെന്ന പടവാളും ചുഴറ്റി വരും പ്രകൃതി 

മിന്നൽ വേഗത്തിലെല്ലാം തന്നെ ചാമ്പലാക്കീടാം..  

"വസുധൈവകുടുംബക"മാപ്തവാക്യമരുളും പോൽ  

വസിക്കുക,പ്രകൃതിതന്നങ്കണത്തിൽ നാം   

മാമരച്ചാർത്തും കാടും കാട്ടിലെ ജീവസമൃദ്ധിയും 

കല്ലോലിനിയും കാർമുകിൽ മാലയും കല്ലും പുല്ലും 

ദശാവതാര സൂചിതജീവികളുൾക്കൊള്ളുമെല്ലാ -

ജീവജാല വൈവിദ്ധ്യസംരക്ഷകരാം നമ്മൾ. 

പൂർവീകർ,പിതാക്കന്മാരനുവർത്തിച്ചതുപോൽ 

പൂർണ്ണമായും പ്രകൃതിയോടൊത്തു വാഴുകിൽ

മഴവില്ലിൻ മനോഹരവർണ്ണരാജിയൊളിചാർത്തും 

മധുരമനോജ്ഞഗേഹമായിടും ഭൂമി.       

Centre for Earth Science Studies

 Thiruvananthapuram Kerala India

A Vision for Our Earth

To unravel the mysteries surrounding the earth and its processes for the sustainable development of natural resources, conservation of environment and management of natural hazards