പിള്ളേരോണം.

ആവണിപ്പിറപ്പിൻ മുന്നെ 

ആർഭാടത്തോടെ നമ്മൾ  

പണ്ടാചരിച്ചിരുന്നോരോണം,

പിള്ളേരോണം. 

തിരുവോണത്തിന്നിരുപത്തേഴു-

നാളുകൾക്ക് മുന്നേ നമ്മൾ 

കളിയാടി വന്നോരോണം 

പിള്ളേരോണം.... 

കർക്കിടകപ്പേമാരിക്കും  

പത്തുനാളൊരു തെളിവുണ്ടേ 

അപ്പോൾ നമ്മളാഘോഷിപ്പൂ 

പിള്ളേരോണം.

തിരുവോണനാളിൻ നാന്ദി

കുറിക്കുവാൻ പണ്ട്,

നമ്മളാചരിച്ചു തുടങ്ങിയ 

പിള്ളേരോണം .

ആർപ്പോ... ഇർറോ, ഇർറോ 

എന്ന് 

കുട്ടിക്കൂട്ടം കൂട്ടുചേർന്ന് 

ആർപ്പുവിളിച്ചാമോദിച്ചു 

കഴിഞ്ഞ കാലം.

മഴപെയ്തു വെള്ളം പൊങ്ങി, 

പാടമൊക്കെ കായലായി 

വാഴപ്പിണ്ടി ചങ്ങാടത്തിൽ 

തുഴഞ്ഞ കാലം...

പൂവിളിപ്പാട്ടിന്റെ നല്ല 

ശീലുകൾ 

മെല്ലെ,മെല്ലെ

ഗ്രാമ,ഗ്രാമാന്തരങ്ങളിലും 

  മുഴങ്ങും കാലം. 

പിള്ളേരോണമെന്നു കേൾക്കെ 

അത്ഭുതം കൂറി നിൽപ്പൂ 

അച്ഛനുമമ്മക്കുമൊറ്റ-

പ്പുത്രനാം കുട്ടി. 

കൂട്ടുകുടുംബരീതി പാടേ 

ശിഥിലമായതിൽ പിന്നെ 

നാട്ടുനടപ്പുകളൊക്കെ 

കീഴ് മേൽ മറിഞ്ഞു .

പൂവേ പൊലി, പൊലിയെ, 

പൊലി എന്ന് 

കുട്ടിക്കൂട്ടം കൂട്ടുചേർന്ന് 

ആർപ്പുവിളിച്ചാമോദിച്ചു 

കഴിഞ്ഞ കാലം.

ഇങ്ങിനി വരാത്തവണ്ണം 

കൊഴിഞ്ഞു 

പോയാ ദിനങ്ങൾ 

നന്മയുടെ നറുമലർ 

വിടരും കാലം!